我哥頂（dén）好去寶山水庫釣大鰱魚、大草魚，該一條魚仔動阿著就完（von）十斤，大个十過斤。佢常會想空想缺，選著哪貼仔水較深，魚仔較多个位所，前一駁仔會先拿炒好香香个香料，宨（tiau⁺）落該水潭肚寧去，分魚仔食，等魚仔食慣咧，毋會提防，放心食時，就容易上釣咧。斯愛有閒著時，佢就會湊兜釣魚伴，非常有耐心，一日到暗跍（ku）到該水庫唇，比賽看麼儕先釣著，麼儕釣个較大尾。
我常勸我哥，毋好做積惡，總想愛去釣魚仔，你佇頭前鈎人，別儕就佇你後背鈎你，你何勞死苦，跍晝跍暗，做積惡來害人，你又無欠食，又無欠著。你知魚仔分你釣著時，係何等个痛苦，你知無？假使講你認為係釣快樂个，釣起來又放佢走，該魚仔嘴著（chòg）傷，無膏（go）藥仔，佇水竇肚寧，傷口發炎，兩下半又乜死忒，該還較做積惡。
有時釣著个魚仔當大條，自己食毋去，拿去送分人食，你試想看啊哦，別人未必然會承蒙你，該積惡敢毋係干（gàm）你㧡，其實我最畏（vŭi）我哥又拿魚仔來分我，拿又毋係，毋拿又毋係。
我哥應我，「除了釣魚仔，我無其他个興趣」，做老弟个我，佢恁樣講，我乜奈毋何。佢到老時，著著（chòg do⁺）糖尿病，非常嚴重，猴筋線斷，當會吃，但是無法度吸收，就恁樣拖到過身，毋知係魚仔个冤魂尋佢出水無，無人知得。
有隻我認識个小學校長一生人都當好釣魚仔，有日佇埤塘唇釣魚仔，無緣無故溜落埤塘肚嗄分水浸死去，你認為該係無緣無故無？我以早上漢文課時，常會摎學生仔談起釣魚仔个因果報應，有隻老學員，厥倈仔當好釣魚仔，到四十零歲咧還係共樣，死無變，厥姆聽了我个解說了後，常勸厥倈仔放下釣檳，毋過一直都無聽厥姆个勸說，還係去釣，也毋知仰般，兩公婆感情毋好盡早就離忒。又過了盡多年，自從佢接觸了佛法，聽師父个教化了後，就無過摸釣檳咧，這變化，最暢个還係厥姆。
【註解】
- 完十斤：接近十斤。
- 哪貼仔：哪兒。
- 宨落：丟進。
- 跍：蹲。
- 跍晝跍暗：整天蹲著。
- 無膏藥仔：沒有擦藥。
- 干你㧡：逼迫帶挑。
- 最畏：最懼怕的是。
- 著著：生病。
- 猴筋線斷：瘦削。
- 死無變：一成不變。
新聞來源：屏東時報
