文/ 詹益雲
1962年我新竹師範畢業分派到台北縣平溪十分寮學校服務，該兩時原始个風景非常靚，像人間仙境，可惜這恁多年來破壞淨淨，還打爽哪！
聽講日本時代到我去以前，炭礦个生利還當好斯，有盡多間點心店，還有旅社、餅店、服裝店、糕餅店、剃頭店…樣樣齊全，火車一日到暗走沒停，來來去去个人像市場樣，仰般鬧熱，一直到1964年炭礦災變死忒30零儕了後，炭礦就跈寧沒落（mùd lòg）忒咧。
該位人个生活、一旦食著（zhog）全摎炭礦有關聯，打炭个人，頭擺人講个「吂死先埋」，極事危險，毋知朝晨也暗晡，錢雖然賺來辛苦，常乜大開大使，較毋知痛。雖然講係恁樣講，有兜東西還係貴蔘蔘仔，尤其肉類最為珍貴，一般人都毋盼得（m păn ded）買來食，也較買毋起。
有間點心店，有段時間常發覺著最貴个雞髀，也無貓仔，也無狗，常無（vu ）緣無（vu）故連連續續打毋見忒，感覺著當奇怪。雞髀當值(dàd）錢，打毋見忒，該損失就大哩唷。點心店个頭家娘又好閼又好愁。佢識聽講寧都仔當會偷摍（so）人个東西仔，該寧都仔，佢看人著，你看佢毋著， 頭家娘疑胡雞髀可能就係分寧都仔摍（so）走个。以後佢緊做生利，不時就緊捉寧該雞髀看，佢佇該雞髀唇放支利利个菜刀。有日食晝邊，果然分佢注意著雞髀汀動咧，頭家娘當煞手，菜刀擎起就剁啊去，一隻血dĭn dĭn 个手指登時跌到砧板頂寧，續寧，佢就緊跟寧該血跡到該寧都仔屋下去，正知係麼儕恁豺偷拿佢个雞髀咧。
【註解】
- 寧都仔：「寧都仔」係人變个，係人念了《寧都經》了後，沒著衫沒著褲，斷條紗線，沒魂沒影个人，一般來講全係細倈人。能渡仔佇自然光線之下沒魂沒影，係講毋係大自然个光線之下，馬上變成原形出來，該寧都精就沒法力，登時會顯出原形來咧。身上任何部分哪係一離開原體，就會無法度受著《寧都經》个保護顯出原形。佢个魂魄放佇一碗水裡肚寧，搭伯公放，食了該碗水就可以變成原旦个人咧，該碗水係捨忒，能渡仔一生人都無法度恢復人身咧！
- 生利：生意。
- 食著：吃穿。
- 大開大使：大肆揮霍。
- 毋盼得：捨不得。
- 摍：竊取。
- 汀動：動。
- 血dĭn dĭn：鮮血直流的樣子。
新聞來源：屏東時報
